ހދ. އަތޮޅު ކައުންސިލުން ކެނދިކުޅުދޫ އަށް ތަޖުރިބާގެ ދަތުރެއް ކޮއްފިއެވެ. 26 މެއި 2023 ވީ ހުކުރު ދުވަހު ހދ. އަތޮޅު ކައުންސިލްގެ 17 މުވައްޒަފަކު ކެނދިކުޅުދޫ އަށް ވަނީ އެ ދަތުރުގައި އައިސްފައެވެ.

ހދ. އަތޮޅު ކައުންސިލްގެ ރައީސް މުޙައްމަދު ސިރާޖް އިސްކޮށް ހުންނަވާ ކުރެއްވި މި ދަތުރުގައި ހދ. އަތޮޅު ކައުންސިލްގެ ނައިބް ރައީސް އަބްދުއް ސައްތާރު ޙަސަން އާއި ހދ. އަތޮޅު ކައުންސިލްގެ ސެކްރަޓަރީ ޖެނެރަލް ޢިބްރާހިމް އުމަރު ވަނީ ބައިވެރިވެފައެވެ. ހދ. އަތޮޅުގެ 9 ރަށެއްގެ ކައުންސިލްގެ ރައީސުންވެސް މިދަތުރުގައި ބައިވެރިވި އިރު ހދ. އަތޮޅު ކައުންސިލްގެ 5 އިދާރީ މުވައްޒަފުންވެސް ވަނީ ބައިވެރި ވެފައެވެ.

ހދ. އަތޮޅު ކައުންސިލުން ކެނދިކުޅުދޫ އަށް ކުރި ތަޖުރިބާގެ ދަތުރުގައި ކެނދިކުޅުދޫގެ ލައިސަންސް ޓްރެކާއި ވޭސްޓް މެނޭޖްމެންޓް ސެންޓަރަށް ޒިޔާރަތްކޮށް ކެނދިކުޅުދޫގައި މިކަންތައް ކުރިޔަށް ގެންދާ ގޮތް ވާނީ ބައްލަވާލައްވާފައެވެ. ތަރައްގީގެ ޕްލޭން ތަކާއި މިހާރު ރަށުގައި ތަރައްގީ ކުރެވެމުންދާ ތަންތަނަށްވެސް ވަނީ ޒިޔާރަތް ކޮއްފައެވެ. އޭގެ އިތުރުން އެތަންތަނާ ބެހޭ ގޮތުން އިތުރު މަޢުލޫމާތު ހޯދުމަށް ރަސްމީ ގޮތެއްގައި ވަނީ ހދ. އަތޮޅު ކައުންސިލުން ކެނދިކުޅުދޫ ކައުންސިލާ ބައްދަލު ކުރައްވާފައެވެ.

ކެނދިކުޅުދޫއިން ފުރުމުގެ ކުރިން މިދަތުރުގައި ބައިވެރިވި ހުރިހާ ފަރާތްތަކެއްވެސް ވަނީ ކެނދިކުޅުދޫގެ ހިތްގައިމު މާހައުލު ބަލާލުމަށް ރަށުގެ އެކި ސަރައްދުތަކަށް ގޮސްފައެވެ. އެގޮތުން ކައިޓް ހަޓާއި ދެއަވަށުގެ ކުޅީގައި ހަދާފައިވާ ބްރިޖަށް ގޮސް ބަލާލައިފައެވެ.

ކެނދިކުޅުދޫ އަށް މިހާރު ވަރަށް ގިނަ ރަށްރަށުން ތަޖުރިބާ ދަތުރުތަށް ދަނީ ކުރަމުންނެވެ. ކެނދިކުޅުދޫގައި ހިނގާ ތަރައްގީގެ ޕްރޮޖެޓް ތަކާއި ލިބިފައިވާ ގުދުރަތީ ރީތިކަން ބަލައިލުމަށް ރަސްމީ ދަތުރުތަކުގައާއި ނުރަސްމީ ދަތުރުތަކުގައި އަންނަ ފަރާތްތައް ދަނީ ދުވަހެއް ދުވަހަކަށް އިތުރު ވަމުންނެވެ.